ARITCLE | POEM | SHORT STORY | WRITING COMPETITION RESULT

Nute Ni pual in SAY Literature Sub Council-in, ‘Nu Hmangaihna’ tih thupui hmanga article, poem leh short story  inziahsiak an buatsaih a. Heng te hi a result a ni.

ARTICLE CATEGORY

1st PRIZE:

NU HMANGAIHNA

-LALNUNTLUANGI

 

          He khawvel a fate nun kaihhruai tu ber leh nun kawng dik zawhna lama hma sawn tir thei ber tu chu Nu te hi an ni a, fate hre chiang a awm chilh hnai ber tu pawh an ni. Fate tan chuan Nu te hi kan engkim kan harsat ber lai leh kan mangan ber lai pawh a kan tan a awm reng leh kan natna te min tawrh sak pawh huam tu an ni.

          Kan Nu te tluka he khawvela kan tih buai ngam leh kan harsatna te ber thleng pawh a min hriat pui a, dawhthei leh ngil nei taka min dawm kang tu hi an awm lovang chuvang chuan Nu te hi an hlu a kan tan thian rinawm min phatsan ve ngai lo tu an ni.

          Pathian hnenah hian kan mamawh te thlen in kan tawngtai thin a, a hlawhtlinna chu kan Nu te emaw Pa te kal tlangin min hmuh tir chang te a awm a, kan hmuh loh chang te pawh awm thin in, hrethiam a ngaithiam thei tur leh thil awm dan phung te chhiar thiam thei tura min zirtir tu chu Nu te hi an ni, kan tan chuan zirtir tu tha tak an va nih tehreng em!

          Fate hian Nu te hlutna hi kan hre fiah zo lo fo thin, min zilh hauh na te hi ning in thinrim a lak chang te kan nei thin a mahse han ngaihtuah chiang teh Nu zilh hau tu, I tana awm reng I lu chunga kut nghat a tawngtai sak tu che, I mangan na Pathian hnen a thlen pui che a su khiang tura pui tu che thian tha leh hmangaihi tu I nei kha a va lawmawm em! Thian nih na hi Nu te tluka hlen zo hi an awm ngai lovang, malsawm na I dawn theih nan a I tana bang lova tawngtai thin tu I Nu rilru kha hriat thiam tum in zir chiang ve thin la, kawng tam taka keini ai a fing lo zawk a kan lo ngaih thin na te hi a dik loh zia hi chawp leh chilh a hmuh tur a awm thin ang hian chu chuan nang leh I Nu in kar kha a ti tha in hma a sawn tir ngei ang.

          “Pathian in khawvel a hmangaiha em em a, chutichuan a fapa mal neih chhun min pe a”, tih ziak kan hmuh ang khan kan Nu te hian an fate keini tan hian nun hlan ngai ni ta se min tlanchhiat san a hnek in kan tan an nunna an hlan ngei ang. Pathian in min hmangaihna tih loh ah chuan kan Nu ten a min hmangaihna tluka nasa hi he khawvel ah hian a awm thei ngai lovang.

Kum khata vawikhat na na na chu kan Nu te chungah kan lawm zia lan tir nan kan hmangaih thu hi hrilh theuh I tum ang u. Piallei thuahriat hnuaia an awm hnu ni lovin, hmun leh hmun hmaichhan ngei  a ”KA NU KA HMANGAIH CHE” tih sawi thei a kan la awm lai hian.

2nd Prize:

NU HMANGAIHNA

-Christina Laldintluangi

Mother’s day alo thleng leh dawn ta mai a, he ni hi nu te leh fa te pawh in nuam kan ti hle thin a ni.  Kumtin hmang a nuam ti hle thin si hian, kan nu ten min hmangaihna hi ngaiah kan nei leh fo thin. Nute ni hmu chhuak tu Anna Jarvisi meuh pawh khan a nu boral hnuah chauh  nute ni hmuh chhuah nachang a hria a nih kha. Ama zarah kumtina kan nu te chawimawina hun kan nei thei hi kan va vannei teh lul em.

Khawvel hmun hrang hrang a nu te hian miziaah in an na riau an nei a. Khawvel hmun dang daih a mi ten social media-a an nu te thil sawi leh tih dan video an post te han en chang hian, ka nu hi hrechhuakin, “mi nu te pawh an lo ni ve tho a nih hi” tiin ka nui ver ver thin. Heng mizia in ang deuh deuh hi an fate an hmangaihna atanga lo chhuak a ni ngei ang.

Nu hmangaihna hian ken tel tam tak a nei a, ka nu hmangaihna chauh hi ka tawnhriat avangin ka nu hmangaihnain a ken tel thenkhat te ka han tarlang ve ange:

1. Tawngtaina: Ka nu hian nitin Pathian hma a kunin, ka taksa leh thlarua himna min dil sak thin a. Hei ngei hi vawiin ni thleng a nun min petu a ni.

2. Dawhtheihna: Ka nu hi nu zaidam leh dawhthei tak a ni lo a mahse ka thil tih sual ngai ka tih nawn fo pawhin min beidawn san ngai lo, dawhthei takin thu tha min hrilh mawlh mawlh thin. Hei ngei hi ka nun kaihruaitu a ni.

3. Hun: Ka nu hi mi buai ve thei tak, phili em em thin a ni. Ka rilru hahna leh ka lungawi lohnate ka hrilh chiam thin a, a hun hlu tak ka khawhral sak fo thin nachhungin “ka ngaithla hman lo” a ti ngai miah lo. Hei ngei hi ka nun ti hlimtu a ni.

4. Inzirna: Ka nu hian ka lehkha zir chhung zawngin min zirtir turin a lo inzir ve char char a; khawvel chhiar dan chuan a ni aiin zir sang mah ila, ka hmalakna apiangah a remthihna leh thurawn fing tak tak te chu ka la ngaichang fo thin. Hei ngei hi ka nun khalh ngiltu a ni.

5. Lungawina: Ka nu hian a engzawnga thlir a thiam hle a, ka lawm loh a ka phunnawi apiangin lungawina kawng min khawhhmuh thin. Hei ngei hi min thununtu a ni.

Ka nu hmangaihna hian huaisenna, tawrhchhelna, inpekzawhna te leh a dang ken tel tam tak a nei a, ziah vek sen a ni lo. Kan nu ten min hmangaih avang hian an nulat lai mizia an thlak nasa ve hle ang tih pawh a rinawm e. Kan nu te hmangaihna hi a ropui in chawimawi a va phu teh lul em. Ka nu ang nih hi ka duhthusam a ni a, mi in “i nu i va ang ve” min tih te hian, ka tan chuan infakderna duhawm ber a ni. Nute ni a lo thlen hian ka nu hlutzia ka hre nawn a, min la dampuitu, nu tha tak Pathianin min pe hi ka vannei hle. Nute ni ah chauh ni lo in, nitinin kan nute hi hmangaihin i chawimawi zel ang u. 

 

 

 3rd Prize:

                                                        NU HMANGAIHNA 

By Lalhmingsanga Pachuau 

A hmasa in nu te ni a lo thlen hian ka nu duhtak leh khawvel a nu te awm zawng zawng chibai tha ber ka buk a che u. Khawvel ah hian I fa ni tura ka lo piang ve hi vannei ka in ti em em a, ka lawm em em a Pathian hnen ah pawh nu tha tak min pek avangin ka lawm e ka ti fo thin. 

Khawvel ka mit in a hmuh theih ve nan ka tan na tam tak I tuar a, Pathian remruat ang zel in ka pa nen chhungkua min dinsak a, nau te tia ka koh tur te nen. “Thufingte 31:26 Finnain a ka a ang a, A kaah chuan ngilneihna thu a awm”. Ka naupan lai a hrisel lo ve thin tak mai bawih sawm ngai tak mai ka ni a, zan rei sawi lovin, hah sawi lovin, chauh thu sawi lovin hmangaih takin min enkawl a. Ka naupan laiin nunphung ka hriat theih nan min zirtir a, kal dan min zirtir a, ka riltam in eitur min pe a, khawvel ah hian eng thil dang nge ngai chuang le. Zirna kawnga hma ka sawn theih nan sikul min kaltir a, mite anga ka thiam ve theih nan in lamah min en pui a, test neih dawn in lehkha zir laia ka taksa a chauh mai hlauin eitur tha kan neih phak tawk min siam sak thin a. Kan tan hian I hlutzia hi thu in a sawi phak lo a ni.

 Pathian kaihhruaina in hun a kal zel a, puitling kan lo ni ve ta, thil tam tak kan lo dai ve ta a, sual lam kawng te pawh hriatloh laiin kan lo dai ve thin a. Mama hi a la tha ngei ngei ang, a la fel ve em em ang tih beiseina nen vawi tam tawngtainaa I din te kha tuna ka lawmna ti zualtu a ni.

 Khawvel ah hian thil zawng zawng min tihsak thei lo mah la Pathian hnen a tlukluh min zirtir a, hei hi ka tan a tawk a ni. Harsat mangang in tlukluh na tur ka hriat phah a. Puih ka ngaih in mi tawngtai sak a, harsatna ka tawh in ka tan I tawngtai a, malsawmna ka dawnna atan ka tan bang lovin I tawngtai a. Ka nu ka lawm e. 

Tun dinhmunah chuan keimah mai ni lovin midang te pawh kawng dik ka lo kawhhmuh ve thei ta. Pathian thu a min fuih nate kha mi te fuih nan ka lo hmang ve thei ta. Peih lo chung chung a lehkha min zirluih tir te kha tunah a chhawr ber tu, hna ka neih theih nan a kailawn pawimawh tak a lo ni tih ka hre ta. A hun lai a ka lo tih that duh loh zawng zawng te khan ka tan vek a lo ni tih ka lo hmu chhuak thiam ta. Ka nu ka lawm e. 

I tan hian thil tam tak ti thei lo mah ila. Ka neihchhun Isua Krista hmingin mal ka sawm che a. I damni lo sei sela, I hriselna Lalpan thuam chak che sela rei tak min dampui turin ka tawngtaina ah pawh ka thlen fo a ni. A tawpna atan he bible chang hian kan khar ang e, “Thufingte 1:8 Ka fapa, i pa zirtirna che chu ngaithla la, I nu zirtirna che chu hawisan suh”. 

POEM CATEGORY

1st Prize:

Hringnun zinkawng zawh tur a, 

I pum chhung ka luah nia i hlimzia  leh, 

Khuanu vena ,duat taka min chawi vangin, 

Ka nu, ka hmangaih  a che. 

Tapin bul ka rawn tan a,

Tap hlirin ka hmang dawn emaw ka ti a, 

A lo ni  lo, i inpekna avangin, 

Ka nu, ka hmangaih a che. 

Rualawhna khawvelah hian, 

Ka awh hlau a, min thawhsakna zawng zawngte, 

Ka mamawh min pek zel avang khan, 

Ka nu ka hmangaih ache. 

I chetzia , hawiher chenin, 

I sawiduh zawng leh i sawi duhdan zawngte 

I hniakhnung  zuiin ka rawn kal zel a nia, 

Ka awmdanah i lung awi em le? 

I awmna ka tan hmun nuam, 

I aw ka hriat lohna apiang hmun khawhar, 

A tulti a I kalbo chang nite hian, 

Ka tlei lo reilote pawh. 

I hmangaihna hrui chuanin, 

Chat thei lo khawpa fei, phelh theih loh a nghet

Miten min thiam min chantir loh lai pawhin, 

Ka thiamna min zawnsak thin

Ka khawvel ni  a ralin 

Khawnge ka thlarau a kal ang, ka zawt che, 

Thinlai damten zanmu chhing lul lo la, 

Ka kalna tur i chian hma chuan. 

By : R Lalhuliana. 

        Vaivakawn Corps

2nd Prize:

3rd Prize:

NAUPANG CATEGORY

1st PRIZE

2nd Prize:

Heng bak ah hian Consolation prize  Tv. R. Lalmuanpuia, Lalruatsangi ( YP ), Lalengzuali (YP ) leh Tv. Lalremruatdika an dawng bawk a ni.

SAY Literature Sub Council competition buahsaih a kan judge zahawm tak tak te leh  ti hlawhtling tu zawng zawng chung ah rilru leh tih tak zet in lawmthu kan sawi a, kan nu te i chawimawi zel ang u.