Good Friday 2025 | 18.4.2025

- Reported by Documentation Board

 Chawhma Inkhawm

         Pu Lalramnuama, JSS in inkhawm kaihruaiin Bible chang Isaia 53:5 leh I Petera 2:24  chhiarin tawngtainain inkhawm a hlan a. Hla No. 138 " Thisen hlu thisen hlu " thlangin Pathian faka zaihona hun nuam tak hman a ni.

          Pu R.C Daniela, CSM in puantur tul leh programme awm tur te puanna hun a hmang a ni.

         Vaivakawn Corps Band ten " Aw hmangaihna sawithiam ila" tih hla mawi takin an rawn rem bawk a ni.

     Home League te hnen atangin "Eng nge sual tifai thei ang" tih hla hmangin Timbrel Display hmuhnawm tak enho a ni.

       SAY Songsters ten Pathian fak leh chawimawi nan "Kalvari a Krista" tih hla mawi leh nung tak maiin an rawn sa a ni

        Pi H.Lalawmpuii, HLS in Bible chang Galatia 3:13 chhiarin "Krista kan damna famkim  " tih thupui hmangin Pathian thuchah a sawi ngaihthlak a ni. Thupuan ropui zia sawiin heng thu hrang hrangah hian Pathian hian thu inthup tam tak A ziak a. Lucifer a chungchang te sawiin van atanga a peih thlak a nih khan chhan tha tawk tak a neih rin a ni a, Eden huan chungchangah Evi leh Adama ten huan lai taka thei rah an ei avanga mihring te Pathian nen a kan inlaichinna a lo tlakhniam dan leh thei rah an ei hnua chhia leh tha hriatna kan lo neih tan a, kha kha Diabola duh dan leh Pathian lak atanga min lak hranna hmanrua a nih dan te a sawi a ni. Kha an chhia leh tha hriatna avanga suaruak an nihna khuh bo tur khan savun kawr siamin an taksa an khuh bona turin thisen chhuahna kha a lo thleng ta a ni. 

Pathian hre lova kan boral chuan thihna a awm tawh dawn lova; misual chu tihsualin an awm ang a, mifel chu tihfelin an awm dawn a ni. Tun a kan nun hman mek nen hian a inmil em em a. Genesis ziakah hian Pathianin khawvel a din dan chiang takin kan hmu thei a, Bung 2 ah chuan Pathian thil ti thei takin lei Eden hi a siam chian zia kan hmu a, thei ei loh tur an ei chuan an thih tur thute a sawiah khan mihringte bawhchhiatna chiang takin kan hmu thei a ni. 

        Isua kha min chhandam tur chuan khawvelah a pian a ngai a, Van atangin min rawn tlan theih loh avang a ni. Isua kha leiah khan tan a ni ngai lova Juda dana thah a nih theih loh avangin Pilata thuneihna hnuiah khenbeh a nih theih nan an hruai ta a. Kross a khenbeh loh hram kha chu a duh dan ber a ni a; nimahsela, Pathian thu chu hnial rual a nih loh avang khan hreh tak chungin "He no hian mipel lul rawh se, mahse I thu ang ni zawk rawh se", a ti a. Min chhandamna tur kha pumpelh a tum lo mahse Kross erawh kha chu pumpelh a duh ve a ni. Kross a putna Kalvari hmuna A kalkawngah pawh khan entu tam tak an awm a, tuma puihna reng dawng lovin anchhe tinreng dawngin kan sualna zawng zawng te min phurh sakin Kross ah khenbeh a lo ni ta a ni. Khawvel rorelna ni lovin Pathian rorelnaah mifel chuan misual te tan a lo tuar ta daih a, keini misual te hian he tlanna hi kan hrethiam lo thin a ni. 

        Kross ah chuan sual setana a min beihna zawng zawng kha silfai kan lo ni ta a. Kan nun hlui te, kan chapona te, mahni indah sanna te, mindang huatna te, rethei bik ni a inhriatna te, vanduai bik ni ang a inhriatna hmang hian Diabola chuan kan keartuiah chuan min chuk thin a, thinthlak mai hi a phal lo thin a ni. He Diabola chukna atanga tal chhuak tur hian kan tawrh ve a ngai a, Pathian pawn kan tih theih tawk hmachhawn min phalsak a ni. Diabola chuan buaina leh harsatna chi hrang hrang min thlen thei a, mahse Pathian chuan Kross hmangin khang hrasatna te kha thingthla thei turin chakna min pe thung a ni. Kross a thih pumhlumna hi a pawimawh ber chu a ni. 

        Midang te chak lohna, fel lohna sawi tam mi nih hi Kross a tihnghehna dawngtu tan chuan tih loh tawp tur a ni a, midang sawi leh rel te hi ringtute tih loh tur a ni. Pathian thu hi mahni tan vek a ni a, kan mamawh ang tawk kan nuna lak luh hi kan tih mak mawh a ni. Vawiin a kan chan hi a ropuiin "Kross" hi Kristian kan nihna chhan pawimawh tak a ni a, he Good Friday kan hman hi a hlawkthei ang berin hman kan tum tur a ni.

        Kan sual min tlanchhuah hnu pawha kan sual kan ngaihtuah let fona te Pathian laka inthiam lohna rilru kan neih zawng zawng te hian Pathian nena kan inkar a tinghing nawn leh thin a; nimahsela, Pathian erawh chuan kan hun kal tawh te min hriat reng sak lovin kan tun hun/nun zawk zel hi a ni chuan min hriatsak zawk thin a ni. Kross lerah A thisenin mi tam zawk min tihhuh theih nan tan i la nasain, i inti thianghlim nawn leh ang u. A Kross vuan tlat chunga kan harsatna zawng zawng te nen Aman min chawlh tir hun tur chu nghak fan fan ila, keimah ni a damna famkim, thinlung thar, ngaihtuahna thar min rawn pek hun chu Amah a intulut tlatin nitin Kross bel chungin i nghak ang u.

        Vana kan chhuan tur chu "Kross" hi a ni. Kross chauh hi Vanram kan luh theina tur ticket pawimawh tak chu a ni. Kross thu hi boral mekte tan chuan atna a ni a, Chhandam mek te tan chuan Pathian thil tih theihna lo lanna tur a ni. Vawiinah hian Krista chu kan damna famkim ni turin sawm ila mualphona tinreng tuara dan anchhe lak atan min tlantu chu i fak ang u.

        Hruaituin hla hnuhnung atan Hla no.95 ," Aw fak r'u, Pathian Beramno" tih hla hmangin Pathian fak a zaihona hun hman a ni.Tawngtai rualna neiin chawhma inkhawm tihtawp a ni.

Zan Inkhawm

    Pu B.Lalsangzuala, Color Sergeant-in inkhawm kaihruaiin Bible chang Rom 3:23-26 chhiarin tawngtainain inkhawm a hlan a. Hla No.137 "Thumak ka sawi nin theih loh chu Kalvari chanchin a ni" tih hla Pathian fak leh chawimawinan sak ho a ni.

        Pu R.C Daniela, CSM in puantur tur tul puanna hun a hmang a ni.

    Pi Vanlalruati hnen atangin hriatpuina hlawkthlak tak "Pathian hmangaihna thui loh kawr" tih hmangin ngaihthlak a ni.

    Pi K. Vanlalhruaii hnen atangin hriatpuina ngaihnawm tak " Pathian in kan tana a tawrhna chungchang" ngaihthlak a ni.

        Pu Lalhmunsanga'n Lal Isua kan tan Kross-a A thihnaah hian kan thi ve tak zet em tih thu hmangin hriatpuina a sawi bawk a ni.

        Pi Lalkhumtirin hriatpuina Hla No.114  "Ka sual atan ka Tlantu-in" tih hmangin zai hona neih a ni.

Maj.R.Lalringngheta, CO in hriatpuina thu thuhmaah neiin Krista kan damna famkim a nih zia sawiin, tunlaiah Health Care Scheme tih hunlai a nih ang hian kan damna zawng zawng thlen theitu Pathian hnenah Van lamah hian Health Care Scheme kan ti tawh em tih zawhna a siam a. Van lam ration card ah hian kan lo chuang lo reng ang tih hi a hlauhawm tak zet a ni tih a sawi a ni. Bible chang,  Marka 15:12-16 leh Leviticus 16:20 atang tein a chhiar zawhah CC Esther Lunmuankimi zai tura sawmin Pathian fak leh chawimawi nan "A saw raltiang tlangah" tih hla mawi takin a rawn sa a ni.  

 "Krista khawvel sual kalpui tu chu" tih thupuiah hmangin Pathian thu a sawi chhunzawm a ni. Adam fate pahnih inthawina atang pawh khan a hriat theih a, Pathian hian thisen hmanga inthawina hi a ngai hlu em em mai a. Leveticus chanchin kan chhiarah pawh khan an khawlohna zawng zawng te, an sualna zawng zawng te kha kel chungah an nghat ang a, thlalerah a kal bo pui tur a ni tih a inziak a. Lal Isua Kross a thih khan kan sual zawng zawng A kal bopui a Kalvariah a nghat a ni. Zaninah hian nang leh keia sualna ran thisen pawhin a tihfai theih tawh loh kha Lal Isuan a phur a, Kalvari ah a nghat a ni. A nghah chiah khan thil mak tak a thleng a "ni eng" kha a thim a, lir a nghing a, temple puanzar  a thler a, lungpui a lo khi chat a, thlan a lo inhawng ta a, a va ropui tak em. Chutah chuan nang leh kei hi Lal Isuan min lo chhanchhuak a, min lo tlan ta a ni. Hemi avang hian Good Friday kan lo hman theih phah a ni. Hmanlai hunah chuan Good Friday lo thleng turah hian mitthi dar an vua a, mitthi awm ang maiin an tah thin a ni. Amaherawhchu, tunah chuan he kan sual zawng zawng tlenfaina ni hi hlim takin kan lo lawm ta thin a ni. 

    Thuthlung hluiah chuan batna lehkha a tam em em a, mihringin kan zawm theih loh dan tam tak kan nei a, chu zawng zawng chu Lal Isuan vawiin niah hian min laksak hi a va hlu em! Johana 1:29 ziakah chuan "En teh u Pathian beram no khawvel sual kalpui tu tur saw," tih ziak kan hmu a. Heta beramno a tih hi inthawina atana an hman thin a ni a, thuhlung tharah chuan Beramno chu 'Isua Krista' anga tehkhin a ni. 'Khawvel' a tih hi keimahni kan ni a. Chuvang chuan Pathian Beramno nang leh keia sual kalpui tur tiin a lo sawi a ni. Paula hian Lal Isua Krista chhanchin hi a ngaipawimawh em em a, thiamna leh finna chhuan tur tam tak nei mah se Isua Krista chu hlutin A thu hril kawngah a lantir thin a. "Kei erawh chuan kan Lal Isua Krista Kross lo chu kan chhuan loh tur zia chu," tiin a lo sawi a ni. Paula chuan siamthar lehna serh tanna ai pawhin a ngaipawmawh hle a, thil dang zawng zawng aiin a dah hmasa zawk a ni. Fatir nihna hi kan Bible hian a dah hlut zia kan hmu thin a, Jacoba te unauah pawh chiang takin kan hmu thei a. Ro luahtu nihna hi khawvel thil tak pawhin a pawimawh tak zet a, chutiang bawk chuan Vana ro luahtu nih pawh hi thil pawimawh tawp khawk a ni.

    Isaia ziakah chuan kan natna te a phur thu leh a vuakna vuala tihdam kan nih thu chiang takin a ziak a. Johana ziakah khan nang leh kei hi thiam loh chhantir turin khawvelah Pathianin a Fa hi A rawn tir lova; kan sual zawng zawng thlengfai turin A rawn tir zawk a ni. Lal Isua Kross-a A thihna avangin van khua leh tui nihna hi kan chungah a lo thleng ta zawk a ni tiin a thusawi a titawp a ni.

    Hla No.  138  "Thisen hlu thisen hlu " tih hla hmangin Pathian fakna hun hman a nih zawhah tawngtairualna in hun tih tawp a ni.