SAY Sunday | Dt.22.06.2025

                                                         

Thianghlimna Inkhawm

- Reported by Documentation Board

    Pu Lalfakzuala, SAY Leader-in inkhawm kaihruaiin Bible chang "Thufingte 24:10-12",  chhiarin tawngtaina in inkhawm a hlan a. Hla No. 308 " Pen ru, pen ru", thlangin Pathian faka zaihona hun hman a ni.

    Pu RC Daniela, CSM-in puan tur tul leh thawhlawm lakkhawmna hun a hmang a ni.

     Nl. Lalnuntluangi, SAY Secretary-in SAY report kimchang tak pein Literature Incharge hnuaia  Article Inziahsiakna lawmman semna neiin, Nl. Catherine Lalhruaizeli'n pakhatna lawmman a dawng a ni.

    SAY Songsters te hnen atangin " I van in a rawngbawltu", tih hla mawi tak a an rem ngaihthlak a ni.

    Home League te hnen atangin Pi Lalrinchhani'n "SAY te atanga kan beisei" thupui hmangin fuihna tha tak tak: Zirna leh eizawnna chungchang te, khawtlang tana tangkai zawk a inhmang tura fuihna te, inchhungkhurah hmantlak nih tum turin, Inkhawmnaah Full Uniform ha thin turin SAY te min fuihna benglut tak ngaihthlak a ni.

     Nl. Jenny Lalruatkimi'n SAY thil tum te sawihona kaihhruaina hun a hmang a ni.

    Pu R. Lalhuliana, Senior Advisor chuan Pathian Thusawina hun a hmang a. Bible chang Ephesi 2:8 chhiarin "Tunge i nih?," tih thupui hmangin Pathian thuchah nung tak ngaihthlak a ni.

    SAY te innghahna Thufingte 24:11 a tarlan angin he Bible chang hi kan bengah hian ri reng sela, chhanchhuah ngai kan velah hian an awm renga, thi mai turte chhanchhuah hi kan tihtur a ni. Thlarau bo pakhat man  man hi a to em em a, Lal Isua'n ramhuai bawlhhlawh vawk rual kawchhung a a hnawhchhuah ang khan kei ni pawhin kan nun a thilsual awm te kan paih bo tur a ni. Chumi paih bo tur chuan thil tam tak kan chan ngam a ngai a. Thlarau bo pakhat chhanchhuahnan thil hlu tam tak leh tha tam tak a sen kan inhuam tur a ni. 

    Generation Millennial te leh Generation Z te hi pianpui finna neia rawn piang sa an ni a. He Generation hmaa piang te hi chuan an tha leh zung tam tak sengin vawiina thiamna awlsam taka neih theih te hi kei ni chuan harsa takin kan bei a ni. Hmanlai chuan damdawi diklo hmanna te, mipat hmeichhiatna kawngah te, miin sim a tum chuan an sim theihna chance a sang mai thei a, mahse tun ang hunah chuan chutiang a sim tur chuan nunna thap a ngai tawh a. Tunlai hunah chuan nun diklo a awm laklawh chuan mahni nunna thap a sim tum a beih a ngai tawh a ni. Kan hmabak hi kan kutah chiang takin a awm a, kan vela puih ngai leh ruihhlo bawiha tang mek te chu kalsan mai loin an tan tawngtai tam ila; kei ni pawh an ni ang a awm lo turin kan inveng fimkhur tur a ni. 

    Eizawnna rintlak leh  tha dap turin tunlai mite chuan finna an nei a. Mithiam bik, thil chhut mi te chuan tumlai thalaite awmdan tur an lo sawi lawk tawh reng a ni. Midang aia tha leh tling zawka inngaihna, midang chunga leng ni a inhriatna nei an awm thin. Chutih rualin mahni inkhawngaihna leh mi beidawng tak tak te pawh an awm a. Mi thenkhat mahni inngaipawimawh leh mi chunga lenga inngai an awm. Thil reng reng hi a eng zawng a thlir thiam a pawimawh em em a, kan lungawina tura an ti lo a nih pawhin lungawi zel hi mi puitling zia a ni. 

Pathian thuin eng angin nge min sawi -

1)Ephesi 2:8- Rinna avanga khawngaihnaa chhandam: Chumi ringtu kan nih avangin kan rilru leh kan taksa chhandam a ni. Pathian mithmuhah chuan kan inchen vek, chumi ringtu niin nitin hun kan hmang tur a ni.

2)Philipi 2:3- Van khua leh tui kan nih zia: Tun dam chhung reilote atan pawh khawvel khua leh tui nih kan chak a, van khua leh tui a takah kan chan hun phei chuan mak kan la ti ang. Van hian a khua leh tui ni turin min hauh tlat a, Lalpa tana rinawm ni turin min duh a ni.

3)Rom 17- Pathian fate chu Pathian roluahtu turte kan ni: Kan Pathian thu in tupawh Pathian fate chu a roluahtu turin min duh a. Khawvel a ro mah kan it chuan kan Pathian ro min pek tur chu a ropui zawk em em a. Chuvangin kan Pathian roluah turin i inbuatsaih theuh ang u.

Lalpa'n a thu malsawm rawh se.

   Hruaituin Hla no:283 "Lal Immanuela ram zauh tur leh" tih hla thlangin zai hona hun neih a nih hnuah tawngtairualnain inkhawm tih tawp a ni.

Chhandamna Inkhawm   

        Pu K Lalramthara, Asst Leader-in inkhawm kaihruaiin Bible chang "Thufingte-19 " leh "Sam-90:10 ,"chhiarin tawngtainain inkhawm a hlan a. Hla.No: 504 "Aw ka damlai tuipui fawn ", tih thlangin Pathian faka zaihona hun hman a ni.

     Pu R.C Daniela, CSM-in puan tur tul leh thawhlawm lakkhawmna  hun a hmang a ni.

   Nl Lalhmangaihzuali, SAY Treasurer chuan SAY member panga(5) te HSSLC Pass leh Graduate tharte lawmpuina hlanna hun kaihruaiin Maj. R.Lalringngheta, C.O in Certificate hlanna leh tawngtai sakna hun a hmang a ni.

    Short Speech hi Men's Fellowship aiawhin Pu T. Lalhunmawia, MF Secretary hnen atangin ,"SAY te atanga kan beisei," tih thupui hmangin thusawi ngaihthlak a ni a. Corps nihphung leh kal dan te zirchianga, Kohhran leh Pathian tana rawngbawl turin SAy te chu min fuihin, Corps kut leh ke pawimawh tak kan nih thu sawiin inkhawm kal hma turin leh tlar hma lam a thu zel turin min chah a. Member thar te lo lawm kawngah leh biak tlangnel kawngah tan la zel turin SAY te min fuih a. Chhiatni that ni a khawtlang tana tun aia nasa lehzual a, inhmang turin leh SAY te hian kan Budget tlin tum ringawt lovin kan rawngbawlna bakah Salvation Army kaldan phung te zir chiang turin leh hre turin min chah a ni.

    Pu VL Hriatpuia Sailo leh Nl Lalchhanchhuahi Pachuau te hnen atangin, " Ka thlamuanna " tih hla  mawi taka sak  ngaihthlak a ni.

    Pu Dr.Richard CLR Hluna, Senior Advisor-in Bible chang ," Thuhritu 3 :1," tih chhiarin " Hun hman dan thiam/ Hun vawn dik," tih thupui a hmangin thusawi ngaihnawm tak ngaihthlak a ni. Mihring kan tam telh telh ang a, tah chuan kan hun hman dan kan thiam a ngai chho zel dawn a. Kan duh dan tam tak te kan thlauhthlak a ngai dawn a. Hmasawnna kan umna lamah hian kan rinna a tlahniam ve zel thei a. Ramchangkang tak tak te an awhawm rualin Christianity a tla hniam em em a. Changkanna leh finna an zawnna lamah inkhawm leh rawngbawlna te an thlauhthlain kan rinna tih nghehna a lo dal ve tial tial thin a ni.. Kan thil tih tura kan ruat in endik turin leh kan thil tihna leh hmsawnna lam thil kan umna kawngah SAY te chu Kohhran thlahthlam lo turin thurawn min pe a. Tun aia tha zawk a hma sawn thei turin in ennawn fo turin leh kan hun neih theuh te inen let a, insiamrem pawimawh zia te a sawi a ni.

    Stanford zirchianna atangin Social  Media khawihlo turin mi eng emo zat zir chian nan an hmang a. Zir mite chuan pawl(Group) hnih a khung hrangin, ni sawmruk chhung dahhran an ni a. Group 1 chu ni khatah darkar 6 chhung Social Media (Screen Time) hmangin; Group 2 chuan Social an hmang lova. Group 2 a awm te chu an Happiness Index(Hlimna sang zawng) a sang hle a , Social Media hmang zawk ho ah chuan depression leh anxiety nei tam zia an hmu chhuak a ni .Hemi in a lantir chu hun vawn dik pawimawh zia leh hun hman that a pawimawhzia a lan tir thu sawiin; Nula thianghlim pasarih zinga mite pawh kha hun an vawn dik loh avangin an in rin hmain maw neitu kha a lo then hman tak avang khan an lut ve thei ta lo a ni a. Hemi atang pawh hian hun vawn dikloh pawizia kan hmu thei a ni. Hun kan vawn dik hian mihringte kan in zahtawnna kan lantirna pawimawh tak a ni a, mihring tlai reng nih te hi thil zahthlak tak a ni.

Taimakna : Thufingte 12:24 a kan hmuh angin , Taimakna tello engah mah a hlawh tlin theihloh. Lehkha zir na  leh kan thiamthil  tihna kawng theuh ah hian theihtawp leh taima takin hlawhtling ngei turin tum zel kan ngaih thu te. Tunlai khawvelah inelna a sang tawh a, thalaiten kan khawthlir leh zirna kawngah te hmasawn turin ngaihtuahna zau zawk nei turin hma i la ang u.

Mawhphurhna : I Thessalonika  4:11 a inziak ang hian mahni hna a rinawm taka thawh theuh duhna thinlung nei tlat turin min fuih a. Kan hna hmuhna te hi kan bul tanna ni zawk sela; taima  taka thawk turin leh kan hna te hi mawhphurhnaah ngaiin i thawk zel ang u. Luka 6:10 thu a kan hmuh angin  eng hna pawh vuan ila; taima leh rinawm taka kan thawh chuan Pathian hian mal min sawm ngei ngei dawn a ni tih ring tlat turin SAY te min chah a ni.

    SAY thupui pahnihna "Thalai piangthar lo te zawnchhuah a Chhandamna kawhhmuh," tih thu  behchhanin Skit hmuhnawm tak leh zirtirna tha tak nei en ho a ni.

    Pu Lalrinawma, Financial Secretary  hnen atangin SAY Sunday puala lawmthu sawina ngaihthlak a ni.

    Hla no. 299 "Min ngaidam rawh. Aw Lalpa min ngaidam rawh," tih  hmanga Pathian fak hona neih a nih hnuah Tawngtai rualnain SAY Sunday chu khar a ni.