Easter Sunday | Dt.20.04.2025

 -Reported by Documentation Board

Thianghlimna Inkhawm

    Pi.Lalremsiami, HWS in inkhawm kaihruaiin Bible chang hmun thum a mi Matthaia 28:1-7 , Johanah 21:25 leh I Petera 3:21 chhiarin tawngtainain inkhawm a hlan a. Hla No.151  " Thlannah alo awm ta, Chhandamtu Isua " thlangin Band te nen a huho a Pathian faka zaihona hun hman a ni.

        Pu Lalrammawia, CS in puantur tul leh thawhlawm lakkhawmna hun a hmang a ni.

    Tv. Ramnghinglova,Vaivakawn Corps Band Secretary hnen atangin Sunrise Service an neih chungchang report ngaihthlak a ni a. Zing dar 3:00 atangin hun hman tan niin hmun sawm leh pangaah rimawi hmanga Lal Isua thawhlehna thu puan chhuah a ni.

        Pi Vanlaruati hnen atangin Johana 20 behchhanin "Isua thawhlehna" chungchang hriatpuina nung tak ngaihgthlak a ni.

        Vaivakawn Corps Band te hnen atangin "Crown the Saviour " SA Hla bu No. 149 chu mawi taka an rem ngaihthlak a ni.

        Pu R.C Daniela, CSM in thuhma sawina hun neiin Thawhlehna kawngzawh a thawm rimawi tak tak zingkar atanga ngaihthlak tur a awm kha nuam a tih thu leh a hlimawm em em thu a sawi a. A thawhlehna ni hi a ni hliah hliah bik niin a hriat thu a sawi bawk. Band te pawhin tlawmngaih chhuah a Items an neih theih zel avang pawhin lawmthu a sawi a ni. Bible chang hmun hnih a mi Matthaia 28:16-20 leh Rome 6:4 chhiarin "Thawhlehna thiltihtheihna" tih thupui hmangin thusawi ngaihthlak a ni. Chanchin tha Matthaia ziakah hian Isua Krista thihna atanga thawhlehna a thil thleng te hmuh tur a awm a. Isua thawhlehna hmututen an sawiin, a lan dan chu kawlphe ang mai a nih thu leh A silhfen chu vur anga var a nih thu te a sawi a ni. Kha thawlehna a thlan vengtu te kha hlauvin an khur a, Mari leh midang ho te pawh kha hrilhhai taka an lo awm a rinawm a ni. Vantirhkoh rawn inlarin Isua kha thlana a awm tawh loh thu leh a thawhleh tawh thu a lo sawi si a; Isua chu Galili ramah a awm thu sawiin Mari te pawh an laichin te hrilh turin an tlan nghal a, chumi kawngah chuan Isua chu an tawk ta a, A ni chuan a zirtirte khan Galili ramah an hmuh theih tur thu hrilh turin a lo chah a ni.

       Kha thlan vengtu te khan Isua thawhlehna kha puithiam te hnenah an va thlen a, puithiam te chuan thlan vengtu te chu pawisa tam takin an tham ta a, A thawhlehna kha midangin an hriat kha an hlau em em a ni. Galili ramah Isua chu zirtir 12 te hnenah chuan a inlar ta a. Isua chu an hmuhin A kephah khawihin Chibai bukin an kun a ni. Khawvel ram tinah chanchin tha hrila kal chhuak turin leh A ni chu an hnenah a awm zel tur thu a sawi bawk a ni. Johana 11:25 ah khan Lazara thih thuah a farnu Marthiin Isua chu awm ta se an nuta pa Lazara chu a thi lo tur  tiin a sawi a. Isuan 'Amah chu thawhlehna leh nunna ' chu a ni tih a sawi a. Peter ziakah khan Isua Krista thawhlehna avangin Chhandam kan nei a, Baptisma chu dilah emaw lui luangah emaw Pa leh Fapa leh Thlarau thianghlima an chhanna hi a ni a, Pathian mite zinga mi a ni tih a lantir. Rom 6:4 ah chuan Keini pawh nunna thara kan awm leh theih nan Pa khawngaihnaah keini pawh kaihthoh kan nih leh dawn a ni tih thuziak kan hmu a ni.  

        Matthaia bung 27 ziak tawp lamah khan Puithiam zinga hotu te kha Isuan thu a hrilh laia a tuk thum ni a A thawhleh tur thu a sawi kha an hre reng a. Kha thu kha a thleng dik ang tih an hlau em em a, ram awptu Pilata hnenah thlan vengtu an dil  a. Pilata khan an tih tih a ti tura a tih angin thlan vengtu an dah ta kha ani a. Amaherawhchu, kha thawlehna kha tuma dal theih a ni lova, Isua thawhlehna kha chu a lo thleng ta tho si a ni. Pathian thu chu a ngai reng a nih zia a tilang chiang hle a ni. Isua chu zirtirte bakah a thlan tlawhtute hnenah te a inlar thu kan hmu a ni. Isua khan a zirtir te hnenah khan ni thum tukah a thawhleh tur thu kha a sawi a; mahse, hmeichhia te kha a thlan tlawh hmasatu an nihna lai leh a zirtir te zawk a hmu hmasatu an nih lohna lai tak te kha a makin a ropui hle. Hmeichhia zawk te kha a thawhlehna hriatpuitu berah an tang a ni.

        Johana 21:25 ah chuan Isua kha Pathian nihna leh mihring nihna  nei a ni a, Amah hi Thlarau Thianghlim chu a nih thu a tarlang a. Ringlo mite chuan a thawlehnaah phatna an zawng kha an tih awm reng a ni; A zirtir te zawk kha thlan ata ru chhuak tuah mawhpuh tumin mipuiin an hriatchhuah hlauin vengtute kha tangka tam takin an tham ta zawk a. Isua Krista erawh chu a tho leh tak zet a, chu  A thihnaah chuan phumin kan awm a, a thawhlehnaah chuan kan sual zawng zawng te thlenfai leh silfai kan lo ni ta a; nun thara kaihthoh a Chhandam kan lo ni ta zawk a ni. Kha thihna leh thawlehna kha chuan Chhandam kan nihna tichiang tu a ni. 

        Thlarau Thianghlim Baptisma pawimawhna chu keimahniah Thlarau Thianghlim a awm ani tih chianna a ni. Kha Thlarau Thianghlim lo thleng khan kan nunah tih tur min rawn chhawp sak a, keimahni lama fel lohna tam tak te nen zawng zawng khan A ni chuan min kaihhruai A duh a, Ama nun dan anga kan nun a, Ama thih anga kan thih a, Ama thawhlehna anga kan thawhleh chuan keimahniah A chhandamna famkim chu alo thleng dawn a ni. Keimahni hi Isua hnathawh chhunzawm puitu tur kan ni tih hre rengin theih tawpin tan la ila, Pathian chuan kan theih ang tawk a hria a, kan phak ang tawk a hre bawk a ni. A chanchin tha puan hi kan theih ang tawkin kan tih tur a ni tih hriain kan zavaiin tan I la thar leh ang u. Pathianin kan za atan mal min sawm sak rawh se.

        Hla No. 137  "Thu mak ka sawi nin theih loh chu," tih hla sak hona hun hman a nih zawhah tawngtairualnain inkhawm tih tawp a ni.

Chhandamna Inkhawm

        Pu Lalrinawma, SAY Financial Secretary-in inkhawm kaihruaiin Bible chang hmun hnih a mi Johana 6:54 leh Thupuan 21:24 chhiarin tawngtainain inkhawm a hlan a. Hla No. 389 "Kawng zau taka hawnin a awm" tih hla thlangin Pathian fak leh chawimawina hun nuam tak hman a ni.

        Pu R.C Daniela, CSM in Corps chhunga puan tur tul leh thawhlawm lakkhawmna hun a hmang a ni.

        Pu Thangliana hnen atangin thahnem ngaihna thu ngaihthlak a ni a, Easter Sunday pual thusawiin amah a hneh thu leh hriatpuina tha tak a pek thu a sawi a ni.

        Pu R.Lalhuliana, RS in Prayer Ministry Programme zan chanve tawngtai awm tur chungchang, Central Jail/Central Women Jail tlawh tur leh Bial Programme lo awm tura programme puan zarna leh sawi zauna hun a hmang a ni.

        Pi H.Lalawmpuii, HLS hnen atangin Mari te hovin vartian a Isua hriak thih tura an va kal thu chungchangah hriatpuina a neih chungchang ngaihtlak a ni.

        Maj.Vanlalsiami, Commanding Officer-in tawngtainain a thusawi tur hlanna hun a hmang a. "In" hi a pawimawh em em a, he khawvel a kan chenlai hian Van lam thlir lo tur a min tibuai theitu thil tam tak a awm a. He leiah hian In chu nei mah ila nakin a kan thih hnua kan kalna tur kan In 'Vanram' hi a awm ngei a, chu In tak Pathiain min buatsaih sak hmun chu thleng thei tura kan inbuatsaih hi a pawimawh tak zet a ni. He kan lei In hi thiat mah se Vanah kuta sak loh Pathianin min buatsaih sak chu thleng ngei turin kan nun leh kan hun te kan hman hi a ngai hle a ni. Thalaite kan thatlaia inawhlum te emaw, ruihhlo bawih a tanna emaw te hi a tam em em nachan hi kan ngaihtuah chuan ngaihzawng vang te emaw, mimal harsatna te emaw, zirna avang te emaw hian a ni thin a. Kan hnathawhnaah te kan bul vela thil thleng avang te pawhin harsatna chi hrang hrang kan tawk thei thin bawk a. Thian neih loh hlauh vang te leh min kawm duh loh hlauh avang tein mahni nun tichhe theiah te kan intaplut ve thin hi a tha lo hle a ni. Chhungkawn harsatna tam tak kan tawh pawhin tlu mai lova nghet taka din hi kan tihmakmawh a ni. 'Kristian kal fimkhur rawh,' a tih ang khan kan nunah hian kan fimkhur a ngai hle a ni.

        Johana 20:19 ziakah leh II Korinth 5:1 ziakah khan zirtir te hnenah Isua a inlar thu kan hmu a, "In chungah thlamuanna awm rawh se," tih hian a chhiartu tan mai bakah a lo ngaithlatu tan hian a thlamuanthlak hliah hliah a ni. Pain ,''Kei hi min tir,'' tih ang khan Pa hian keini hi min tir a; chu min tirhna chu kan hriatchian a ngaiin Isua aiawhtu kan nih angin A hna chhunzawm tura min tih hi kan zawm a ngai a ni. ''Thlarau Thianghlim nei rawh u,'' min tih angin Pathian Thlarau Thianghlim nei lo chu khawnvartui tel lova a khawnvar nei ang chauh kan ni a ti a. Isua hian Thlarau Thianghlim kan neih loh hi a hlau hle a, Thlarau Thianghlim tel lova rawngbawl phei hi chu thil hlauhawm tak a ni.

        Ezekiela ziakah khan mitthi tawh te kha raldo inpeih sain an lo nun theih nan khan thaw kha pek an ni tih kan hmu a, Pathian pawhin keimahni a Thlarau Thianghlim a thlen theih nan khan keimahniah thaw A pe a nih loh chuan rawngbawlna zawng zawng pawh hi mihring thahnem ngaihna mai a ni theih thin a ni. Mihring nihna: phunchiarna leh thil a dik lo zawng a ngaihtuah tlatna te hi thil tha lo tak mai a ni a, ringtute chu hetiang lakah hian kan inthiarfihlim thiam a ngai hle a ni

        Isua Krista thawhlehna hian keimahniah siam tharna a rawn pek ngei hi ring tlat ila. Thawhlehna chuan keimahniah chakna leh huaisena te min pek beisei ila; he tihna leh thawhlehna hian keimahni mimal tinah min siamtharna hmanrua lo ni zawk sela. 

        Tirhkohte thiltih ziakah khan Isua kha a thawhleh hnu khan zirtirte hnenah ni sawmli chhung A awm a. Khami hun chhung khan zirtirna pein an awmdan tur te chhanchintha an chhunzawm theih dan tur te leh tih tur hrang hrang te hrilhin hun A hmang a. Penticost ni a Thlarau Thianghlim lo thlen huna thiltihtheihna an neih tur A sawi ang khan; khami hnu kha chuan A zirtir te khan huaisenna nasa tak leh thlamuanna nasa tak an neih phah a. Ram tinah an mahniin Chanchintha hril tur khan an kalchhuak theih ta tih kan hmu a, Pathianin a Fapa min tlan turin a lo tir a, keini hi Isuan a aiawh turin min tir ve leh ta a ni.

        Thlarau Thianghlim Baptistma I chungah lo thleng se, siamthat ngai te lo siamtha sela; Pathian hnen kan thlen hunah rorelna dik tak kan chan theihna turin thawhlehna nun tawmpuitu kan nih theih nan Pathianin kan za atan malminsawm sak theuh rawh se. 

        Hla No.145 " Fapa Isua Pathianin a tir" tih hla sak hona hun neih a nih hnuah tawngtairualnain inkhawm tih tawp a ni.