VAIVAKAWN C.O BIAL SIPAI INKHAWMPUI 2024 | Dt.30.11.2024 & 1.12.2024

Reported by Documentation Board

Tawngtai Inkhawm

            Pu PC Lalremsanga, Bial Vice Chairman in inkhawm a kaihruai a hruai a, Bible chang ‘Jakoba  4 : 7-10’ chhiarna hun  neiin  inkhawmpui  hlanna hun a nei a ni. Pathian fak leh chawimawi nan Hla No. 77 ‘Mal min sawm turin Vankhua an ro a rel’ tih hla Zotlang Corps Priase Team te kaihhruaina hnuaiah sak hona hun hman a ni.

            Pu RC Daniela, CSM Vaivakawn Corps hnen atangin thawhlawm lakkhawmna leh puan tur tul te puan na hun a nei a ni.

         Maj. R.Lalringngheta, CO in sipai inkhawmpui a lo kal zawng zawngte lawmna hun a nei a, Bethesda Team Speaker Evan Lalthanzama Hrahsel leh a team te lawmna hun neih a ni a, Sipai inkhawmpui a zawh hnu hian Camping min neih pui nghal dawn bawk a ni. Bial hruaitu OB leh Executive Member te lawmna hun neiin Corps tin atanga lo kal zawng zawngte lawmna hun neih bawk a ni. 

            Tv.B. Lalthlengliana,CC Sergeant, Kanan Corps hnen atang “Nun Tobu” tih hla hmangin fakna hla mawi takin a rawn sa a ni. 

          Dr. VR Hmachhuana, Bial Secretary hnen atang hun ruatna te tih hlawhtlina a awm avangin lawmthu sawina hun a nei a, Vaivakawn C.O Bial Sipai inkhawmpui zawh a Camping neihna turah Sipai inkhawmpui a kal zawng zawngte camping lut vek turin sawmna hun a nei bawk a ni.

            Kanan Corps Band ten Pathian fak hla mawi takin an rawn rem a ni.

              Zotlang Corps SAY Songster te hnen atangin Pathian fak leh chawimawi nan   “Thim in lei a tuam laii”  tih hla mawi takin an rawn sa a ni.

               Nl. Lalhmangaihzuali, CC Sergeant, Vaivakawn Corps hnen atang “Zawng zawng hlan che ka duh”  tih hla hmangin Pathian fakna hla mawi takin a rawn sa bawk a ni.

         Home League Vaivakawn Corps ten “Eng nge sual tifai  thei ang?” tih hla hmangin Timbrel Display hmuhnawm tak an rawn lantir a ni.

            Evan Lalthanzama Hrahsel Bethesda Team Speaker in   ‘Sam 85 : 6 leh Galatia 6 : 15’ chhiarin “Siamthar lehna” tih thupui hmangin thu a sawi a. He thupui atang hian Corps active member thlarau thianghlim nen a inpawh tawh lo tam tak kan awm a, kan ramah hian Pathian khawngaihna kan dawng nasa a, harhna kan dawng nasain Pathian thlarau in min awmpui mai bakah sakhuana in min chiah piah nasa a. Amaherawhchu kan nu dan a hmuhnawn si loh avangin siamtharna kan mamawh. Phur tharna chu kan chang ngun mahse siamtharna chuan nun a thlak thleng thin. Paula,  Stephana an deng hlum lai a awm ngei pawh kha Damaska khuaah Siamtharna a chang. Phurna ringawt hi chuan midang a tina, Siamtharna chang chu a nunah hmuh tur a awm. Hrilh nawn fo ai chuan Thlarau thianghlim khawih a pawimawh. Khawvel Kristian ten a an buaipui ngai loh Mizoram Kristian ten kan buaipui thin chu thim thuah hnih te leh Zoramthar te kan buaipui a amaherawhchu Bible in Chanchintha hril turin min duh a ni.

            Kan nu leh Pa te Kristian an nih avang leh Kristian ni tur a min ziritr avanga lawmthu kan sawi a tul zia te, Pathian thu kan sawi tam leh kan chhiar tam ang aia kan nun a hmuh tur a awm lo erawh Siamthar lehna kan chan a tul zia a sawi bawk a. Phur thar lehna chuan kan phur chhung chauh a daih a Siamthar lehna erawh chuan kumkhua a daih a a nunah hahchawlhna leh thlamuana a neih thin thu te sawiin hriatbelh aiin Thlarau thianghlim siamthar theih tur a kan in pumpek a pawimawh  a tul thu a sawi a ni.

Siamtharna mamawhtute :

Point Khatna : Bak ang a muthlu –  Bak hi a ban tha chakna hmangin a muhil thin a, mihring pawh hi a ban tha chakna hmanga uai tang mahse thlarau a muhil bawrh bawrh an tam in siamtharna nun an neih a pawimawh hle a ni.

Point Hnihna :  Sakawr ang a muthlu – Sakawr hi ding reng chung a muthlu thin an ni a, chutiang bawkin mihring pawh hi muthu reng si sual lian tham ang a ngaih loh sual ti reng an awm thin avangin siamthar an mamawh takzet a ni.

Point thumna : Thlaler chhimtir muthlu chu -  Thlaler chhimtir hi maimit chhing lova muthlu in a meng ker thin a, hetiang chiah hian mihring nunah pawh thusawitu thusawi lai ngaithla reng si a thlarau lamah engmah la lut thei lo a kan awm a nih chuan Siamthar lehna kan mamawh hle a ni.

Point lina : Tuivawk ang a muthlu – Tuivawk hi tui in a len ang ang a muhil mai thin an ni  a, rinna nghet neilo, ziritrna thar lo kal apiang in a len bo ang hi a ni. Thusawi thar an hriat ang apiang an ngaithla a, chu chuan rinna dik lo ah a hruai sual a, rinna nghet an nei lo. Pathian hian mi rilru nghet, rinna nghet nei mi hi Pathian in a duh a ni. Bul tan nan a Pathian kan auh a tul zia te , Siamthar lehna hi Lalpan a ngaihpawh zia te hre thar leh turin min chah a ni.

          Pu K. Lalpara, Bial Executive Member in banna Hla atan No. 559 “Hlimna ni ropui chu a eng” tih hla thlangin, sak hona neih zawhah Lal biakna sawi zawhah inkhawm tihtawp a ni.

 Thianghlimna Inkhawm

            Pu R.Lalhuliana, Treasurer Vaivakawn C.O Bial-in inkhawm kaihruaiin Bible chang II Timothea 2:15 chhiarin inkhawm te Pathian hnen a hlanna hun a nei a. Hla No.521 "Isua hmangaihna leh thatna" tih thlangin Pathian faka zaihona hun hman a ni.

            Pu R.C Daniela, CSM in puantur tul leh thawhlawm lakkhawmna hun a hmang.

           Nl.Lalnunzawmpuii, Kanan Corps hnen atangin Pathian fakna hla mawi tak "Nang nen chuan" tih ngaihthlak a ni.

         Maj.R.Lalringngheta, Commanding Officer in Bial chhunga a Corps thum atangin Member pasarih te Local Officer atana nemnghena hun a hmang. An tana tawngtaisakna hun leh Chibai bukna hun a nei bawk a ni.

1. Pu R.Lalhunliana, Recruting Sergeant             - Vaivakawn Corps

2. Pu Isak Zonunmawia,  Quarter Master            - Vaivakawn Corps

3. Pu Kennedy Vanlalthlana, Colour Sergeant     - Kanan Corps

4. Pu Lalthazuala, Corps Welcome Segeant         - Kanan Corps

5. Pu H.Khawlrosanga, Corps Visiting Sergeant  - Kanan Corps

6. Pu H.Vanlalnuna , Corps Literature Secretary   - Zotlang Corps

7. Pu LalJohana Pachuau, Corps Secretary            - Zotlang Corps

                Vaivakawn Corps Band te hnen atangin "" tih hla mawi taka an rawn rem ngaihthlak a ni.

          Kanan Corps Songsters ten "Ral do tura inpete chu an chhuak ta" tih hla Pathian fak leh chawimawi nan mawi takin an rawn rem. 

                Tv.Lalnunsanga, Vaivakawn Corps hnen atngin "Khawvel thim entu " tih hla nung taka a sak ngaihthlak a ni.

                Dr.V.R Hmachhuana, Secretary Vaivakawn C.O Bial hnen atangin Report tawi pekna hun a hmang.

                    Nl.Lily Lalthakimi, Zotlang Corps in Pathian fak nan "Thlei bik a nei lo" tih hla mawi takin a rawn sa. 

                  Evan Lalthanzama, Bethesda Team Speaker in Bible chang II Korinth 7:15 leh Thupuan 3:1-3  chhiarin, "Simna" tih thupui hmangin thusawi ngaihthlak a ni. Zoram ten a kan mamawh ber nia a hriat chu "Sualsim harhna" hi a ni. Rangbawl tu tam te kan in en hian nihna chu duh si amaherawh chu mahni a sim tur awm sim leh duh si lo hi kan tam hle mai, sim hreh si nihna ngaipawimawh leh si lo te hi kan tam em em a. Kan ram hian Sualsim harhna hi kan mawmawh hle a he zirtirna hi kan ngaihhlut a pawimawh a ni. Lal Isua phei chuan insim loh chuan in thi ang a ti hial a ni, kan zavai hian sual kalsan a sim tur nei theuh kan ni a tumah hi fel famkim sim tur nei lo kan ni lo tih hi a chiang hle mai a. Luka 23:4-5 ah pawh khan mitin te hian sim tur kan neih zia chiang takin a sawi a. Pathian-in a huat em em chu mirethei chan ai lak sak hi a ni, tun lai sorkar hnathawk tam tak hetiang ang ti mai thin hi an awm a heng mite hian Pathian in a duhloh zawng hi kan hriat chian a kan kalsan ngam a ngai a ni. Chumi anih loh chuan Pathianin kan chungah ro ala rel dawn tih kan hriatreng hi a pawimawh tak zet a ni. Sim a in lam let tak tak te hi Pathian hian a ngaidam satliah mai a ni lo, an/kan sualna zawng zawng thlengin min ngaidam duh vek zawk a ni chuti khawp chuan kan Pathian hian kan chhungah ngaidam na nasa tak a nei ani tih hi i hrethar ang u. Pathian thinurna leih buakna Sodom khua ang kha kan chungah a thlen loh nan he khawmpui kaltlang hian Pathian hnenah inlam let nan hunah hmang ila mahni insiam thatna hunah i hmang leh ang u.

            Lalpan inlam letna hun min pe hi avan lawmawm em. Zakaia chungchangah pawh khan kan hmu a, Lal Isua hmu chakin hmuh tuma a beih nasat zia te kan hmu a kahtiang ang a nasa khan Isua lam hnaih tur hian kan bei ve reng em i in enfiah ila. Aamah a inhriat chian a sim tur a neih zia a in hriat avang khan thinlung leh tih tak zetin Lal Isua hnenah khan a thil lo tih sual zawng zawng te nen a inlam let avangin ngaihdam ani ta ang khan keinin pawh hian Zakaia chan ang kha kan chang ve thei a ni. 

               Fapa thlanbo anga mahni kan inhmangaih lutuk a, a pa hnen atanga a tlanbo chhan pawh amah nawmsak a duh lutuk avang a ni tih kan hria keini pawh hi fapa tlabo ang khan Pathian lak atang kan lo bo pil ve thei reng a ni. Amaherawh chu simin a in lam let a a pa inah a ho leh a lawm takin a pan a lo pawm leh ang khan kan Pathian pawh hian sim tur kan neih te sima a hnen kan in lam let hun hi a lo nghakin a lo thlir reng a ni. Chhungkaw tin te hian sim tur kan nei ani tih hriaiin he khawmpui atang hian hlawkna neiin haw theuh i tum ang u.

            Pu H.Khawlrosang, Bial ECM in hla no.181  "Lalpa chu fakin ka chawimawi ang" thlangin Pathian faka zai hona neih zawh a nih hnuah tawngtairualnain inkhawm tih tawp a ni.

Fakna Inkhawm

           Pu H.Vanlalnuna, Bial Finance Secretary in inkhawm kaihruaiin Bible chang Sam 150:1-6 chhiara tawngtaina a neih zawhah, Hla No.87  "Van hnuai khuavel sakhming chhiarin" thlangin Pathian faka chawimawina hun hman a ni.

                Kanan Corps HOme League te hnen atangin "Khawvel lawm nan" tih hla mawi taka an rawn rem ngaihthlak a ni.

                Zotlang Corps Cadet ten "Ringtu zawng zawngte u" tih hla Pathian fak leh chawimawi nan an rawn sa a ni.

             Esther Lunmuankimi, Vaivakawn Corps hnen atangin "Isua a telve" tih hla nung taka Pathian fak leh chawimawi nana a rawn sak ngaihthlak a ni.

                Hmangaihkimi, Kanan Corps-in "Min chhungkhat la" tih mawi takin a rawn sa ve leh a ni.

                 Vaivakawn Corps Band hnen atangin "" tih hla mawi taka an rem ngaihthlak a ni.

                 Hla No.120 na "Kalvaria hmangaih lo lang kha" tih hla sak hona hun hman a ni

            Evan Lalthanzama, Bethesda Team Speaker in Bible chang Thufingte 12:25, Marka 4:19 leh Mathaia 6:31-33 chhiarin  , "Lungkham" tih thupui hmangin thusawi ngaihthlak a ni. He thu hi tun hnaiah a thinlungah a nun thar zia a sawi a, chhungkaw lamah damlohna ten tlakbuakin Damdawiin hrang hrangah test te neiin an kal kual a mahse an hriat theih si loh avangin phai lamah te an kal a, chumi ah pawh chuan engkim tha vek siin a taksa na erawh a kiang thei mai si lo hian amah ah beidawnna a thlen a. Amah chu kohhran leh khawtlangah pawh theih tawp a in hmangin, Politics lam te hi a tui ve em em a amaherawh chu khawvel thil reng reng hi a lo hoh lam zia leh amah ngei pawhin rilru a lo sen tawhna tam tak te kha thil tul ber a lo ni lo ani tih a damlohna hian a hriatchian phah tir thu a sawi a. He khawvelah hian lungkham loh tur hi kan lo lungkham a, kan rilru ngaihtuahna kan lo seng nasa thin a. Van kan thlenpui loh tur hi kan lo lungkham em em thinna hian keimah ni min ti chauin Pathian nen kan inlaichhina a ti chhia a ni. Khawvela in chhek hausa, nawmsakna chauh zawng tute hi Pathian chuan "mi a" a ti a, amah avanga tuar a an neih chan ngam te hi Pathian chuan "mi fing" a ti thin a ni. Vawiin ah hian khawvel thil hi i lungkham lo ang u, Pathian Lal ram kan thlenpui theih loh tura buai ai chuan Lal Isua hi buaipui berah nei ila, a ram leh a felna zawn hmasak hi ringtute tih tur leh kan tih mak mawh chu a ni. 

            Lal Isua kan thlan avanga kan sum leh pai leh kan neih ro thilin a lo chhiat phah dawn a nih pawhin pawi tih loh tur, Isua nei si lova khawvel hausakna zawng zawng neuh ai chuan Isua nen a retheih ngam hi a hluin a hlawkthlak zawk a ni tih i hrethar ang u. Khawvel tisa thil lungkham chuan hrehawmna bak a thlen lo Pathian lal ram beiseina erawh chuan nun nawmna leh a ram thlen chakna min thlen zawk a ni.

                Pu Lalthazuala, Bial ECM in "Nunna Krista" tih hla thlangin Pathian faka chawimawina neih a nih hnuah tawngtairualna in inkhawm tih tawp a ni.

Chhandamna Inkhawm

              Dr.V.R Hmachhuana, Bial Secretary-in inkhawm kaihhruaiin programme lo awm turte Pathian hnena hlanna hun a neih zawhah Bible chang Rom 8:12-14  chhiarin, Hla No. 187 "Aw Thlarau Thianghlim, lo kal la" tih thlangin Pathian faka zai hona hun neih a ni.

                Pu R.C Daniela, CSM in puantur tul leh thawhlawm lakkhawmna hun a hmang.

                Nl.Rosalyn C.Vanlaruati, Vaivakawn Corps hnen atangin "Vuina tur reng hi a lo awm lo ve" tih hla mawi leh nung takin Pathian fak leh chawimawi nan a rawn sa a ni.

                Pu R.Hranghnuna, Bial Asst. Secretary-in Bial Report-te leh lawmthu sawina hun te hmangin Bial huapa Camping neihna turah Bial hruaitu te bakah Bial Member te hnatlanga kal vek turin sawmna hun a hmang nghal bawk a ni.

                Nl.Elizabeth Lalhmunsiami, Zotlang Corps in Pathian fak leh chawimawi nan "I tap thawmah Lalpa a tho ta" tih hla a rawn hlan a ni.

                Testemony sawina hun hawngin Pu Isak Zonunmawia hnen atangin "Min ti chaktuah chuan engkim ka ti thei" tih hmangin a rawn sawi a ni.

               Vaivakawn Corps SAY Songsters te "Krista an ngai" tih hla mawi leh nung takin Pathian ropuina atan an rawn hlan a ni.

             Evan Lalthanzama, Bethesda Team Speaker in Bible chang Hebrai 11:15-16, Sam 126:5-6 leh Luka 9:23-26 chhiarin, " Kross kalkawng " tih thupui hmangin thusawi ngaihthlak a ni. Lalpa hian a fate hi min duat hlerh hlerh kher lova, tam tak hian tunlai khawvelah hian Lal Isua hnungzui hi malsawmna leh hausak dawnna chauhah kan ngai hi a dik lo hle mai a. Kawng awlsam ringawt hi zawn tur ani lova Lal Isua hnung zu hi malsawm dawnna a nih rualin tawrhna te channa te a ni tel vek tho tih hi hriatchian a pawimawh tak zet a ni. Full time a rawngbawl hna thawkte pawh hian mahni mimal nunah leh chhungkuaah te pawh harsatna hian a bawh bet ve reng a Indo nasa tak hi nitin hian an bei ve reng ani tih hi kan hriat tlan a tha hle a, amaherawh chu khami hunah pawh khan kan belh Pathian lakah hian kan rinna kan nghah ngam hi a ngai thin a rin loh kar hian a thil tih theihna mak chu kan chungah hian a lo thleng zawk thin a ni. 

            Pathian hian natna te, harsatna te, lungaihna te kan tawn hi a phal em em mai a, ama hnena kan thinlung zawng zawng a kan kir hun hi a lo nghak thin. Hrehawm pawisa loa nitin Lal Isua zui kan mamawh em em a, Kross hi kan man fiah a ngai a; Isua Kross hi kan chhuan tur chu a ni a, nitin Isua Kross hi kan put a ngai a ni. Isua Kross put hi thil awlsam a ni hauh lova, mahni inphata Lal Isua Kross hi kan put ngam a ngai a ni, tawrhna pumpelh zawnga Kross put tum hi boralna a ni a; boralna kawngka chu a zau a ni. Nunna kawng erawh a zim a, kal a harsa a, Koss kalkawng hi nawmsitbawlna a ni lo. Ringtu tha tak tak chu tawrhna leh beidawnna ruamah an danglam thin a, Ringtu tha kawng hi a zau lova, a awlsam ngai lo. 

                Harsatna leh lungngaihna tawk ringtu te chu an danglam thin a, tuna kan tawrhna te hi nakina kan la chan tur nen chuan tehkhin tham a ni lo a ni. Van kawng kan pan meknaah hian Pathian tan hrehawm tawrh hi i ngam thar leh ang u. Kan intihchak thar leh a ngai a, Lalpa nen kan tawrh hi ala tlem zia leh ala nep zia hi hrefiah thar ila, Ringtu hmasate tawrhna ropuizia te hi i inhrilh nawn fo teh ang u. Bible ah khan mihausa leh Lazara chungchangah khan hrehhmun atanga Thlarau bo vei a sawt loh zia kan hria a, a damlai khan thil tha tiin Missionery tam tak te kha lo chhawm ta zawk se chuan vanah ro tam tak a lo khawl khawm zawk dawn a ni tih a chiang hle ang khan keini pawh hian Thlarau bo engzah nge kan man ve theih ang tih hi zaninah hian inkhawm zawng zawng ten i hawn theuh ila; tha thlah miah lovin Isua hnung i zui thar leh ang u.

                Maj.R.Lalringngheta, Commanding Officer-in Hla No.228 "Isu ka hmangaih che" thlangin, he hla sak chhung hian a duh apiang tan zahngaihna thutphah hawngin a in hlan thar zawng zawng te tan tawngtaisakna hun a hmang a ni.

                    Hla No.353 "Nitin Isua ka thinlungin ka hmangaih deuh deuh a" tih hla sak hona hun nuam tak hman zawhin malsawm tawngtaina in Vaivakawn C.O Bial Sipai Inkhawmpui chu tih tawp a ni.