Tawngtai Inkhawmpui vawi 3 na | Pathianni

 

THIANGHLIMNA INKHAWM

Reported by Documentation Board

 

              Capt.Isaac Lalhlimpuia, Asst.Co-Ordinator, DPCC in inkhawm kaihruaiin Bible chang Mathaia 6:6 “Nang erawh chuan I tawngtaiin, I pindan chhungrilah lut la, I Pa aruka awm hnenah chuan tawngtai rawh; tichuan, I  chhiarin kan rilru natna kan hrehawm na te kan pindan chungrilah luh puiin a hnenah in tu lut turin min duh a nih thu a sawi a

 

              Pu R.C Daniela, CSM Vaivakawn Corps-in puantur tul puanna leh thawhlawm lakkhawmna hun a hmang a.

 

              Pu R.Lalhuliana, Secretary DPCC in puantur tul dang te puanna hun a hmang bawk a ni.

 

              Nl.Mary K.Lalawmpuii, Bazar Corps in tawngtairual kaihruaiin thupui pathum hmanga tawngtai ho a ni:

1. IET Sipaite Thianghlimna kawngah, taksa, zuk leh hmuam leh ruihtheih thil laka kan fihlim a, kan lo thianghlim zel theih nan.

2. IET Sipaite zingah inhmagnaihna, induhsakna, inhriatthiam tawnna a lo pun zel theih nan.

3. IET chhunga Officer thawklai te Pathian hman theih an lo nih zel theih nan.

 

              Ramthar North SAY Songsters te hnen atangin “Aw ropui ber” tih hla mawi takin an rawn sa a ni.

 

            

              Lt.Col.Zonunsangi, TPCC, THQ hnen atangin thusawi tawi ngaihthlak a ni a, tawngtai inkhawmpui a rawn kal theih avangin lawmthu a sawi a. CND lamin tawngtai beihpui nasa taka an beihna hian rah tha a chhuah zelin, Division dang thlengin a kang kai tha hle mai a. Jail lam rawngbawlna lam pawn hma a sawn zel thu a sawi a ni.

Mosia fate leh Amilek ho an inbeih chungchang sawiin Mosia banphara a tawngtai chhung zawngin an ral beih te khan an hneh a. Chutiang chiah chuan keini ringtute pawh hian kan ban phar chung zelin kan inchhungkhurah te leh kan nitin nunah hian ral kan beih hi kan hneh ve theih thu te, tawngtaina hi hmanraw tha tak a nih thu a sawi a ni. Tawngtai hian Lalpa hnenah I kir ang u.

 

              Dinthar C.O Bial Songters ten “Chatuan chawlhna” tih hla hmangin Pathian fak hla mawi takin an rawn rem a ni.

 

              Pu Zothanpuia Sailo, Zemabawk Corps-in tawngtairualna vawihnihna kaihruaiin tawngtai thupui pathum hmangin tawngtairualna hun neih a ni:

1. IET chhunga Missionary zawng zawngte leh a chawmtu te tan.

2. Mizoram Jail tang zawng zawngte’n thununna hmuna an awm lai a nun danglam an neih theih nan.

3. Sipaite Pathian thu ngainatna kawngah leh amah anna kawnga hma kan sawn zel theih nan.

 

              Central North Division Women Singers-te hnen atangin Pathian fak leh chawimawina hla mawi tak “Min tawngtai tir rawh” tih ngaithlak a ni.

 

              Evan Lalthanzama Hrahsel, Speaker hnen atangin “Hawh u, Lalpa hnenah I kir ang u (Takna-ah)”tih thupui hmangin thusawi tha tak ngaihthlak a ni a. Bible chang chhiarin Lalpa hian mi tak a duh a, a huat ber chu milem te hi an ni. Mihring pawh hian thil reng rengah hnathawk-ah pawh mi rintlak kan duh a, Lalpa pawh hian chutiang mi chu a zawng a ni. A rawngbawl tur atan mi tak rintlak Lalpa neitu dik tak hi a duhin a thlang zawk fo a. Rawngbawltu pamham tak hi kan tam tawh em em a, kan velah pawh hian hmuh tur tam tak an awm  a ni. Lem taka rawngbawl te hi an mahni chauhin an tuar dawn lova an thlah te thlengin an tuar dawn a chuvang chuan Takna kan neih hi a pawmawh hle a, mihringte chuan pawnlam lan dan kan en thin a; Lalpa erawh chuan kan thinlung lam hi a enthin thu a sawi bawk a.

              Johana ziakah Nathanaela chanchin sawiin mi rilru nghet a nih zia chiang takin a sawi a. Mi hriat kher ni lova mahni a theipui kuang kianga a lo tawngtaina te khan Pathian hnen a lo thlen daih tawh thu a sawi a. Chuvang chuan midangte hmuh ringawt a rawngbawltu ni lovin fianrial lam a Pathian kan lo biakna hi a ni Lalpa, Pathian-in mi tak a tih te chu ni.

              Rangbawlna chiah hi Pathian lawmna a ni lova, A aw ngaihthlak hi A duh a ni. Mathaia Bung 25 ah pawh 'a tak leh a lem' chungchang chiang takin kan hmu a. Nula thianghlim sawm chungchang sawiin an ni ang hian fiahna hi kan la hmachhawn vek dawn a ni tih hriain; fiahna tak tak kan hmachhawn hunah zahna kan tawn loh nan “Hawh u, Lalpa hnenah “Takna-ah” I kir leh ang u”, a ti a ni.

 

              Maj.Zahluna, Zemabawk Bialtu C.O-in hla thlangin malsawm tawngtainain thianghlimna inkhawm a ti tawp a ni.

FAKNA INKHAWM

 

              Maj.K.Zaliana Hermon Bialtu C.O-in inkhawm kaihruaiin Hla No.266 “Malsawm ruahte a tla a nga” tih hla thlangin, Bible chang Sam 148: 1-3 “Lalpa chu fak rawh u. Van atangte khian Lalpa fak ula: Chung lamahte khian amah chu fak rawh u. A vantirhkoh zawng zawngte u, amah chu fak rawh u. Ni leh thlate u, amah chu fak ula: Arsi engho zawng zawngte u, amah chu fak rawh u. ” tih chhiara tawngtaina hun a neih zawhah inkhawm tan a ni.

 

              Pu R.C Daniela, CSM Vaivakawn Corps-in puantur tul awm te puanna hun neiin hei aia tam inkhawm zel theih turin Member te a sawm bakah tlai lam ruai theh vek turin a sawm nawn leh bawk a ni.

 

              Pu R.Lalhunliana, Secretary DPCC hnen atangin thupuan tur tul leh inkhawm awm dan tur puanna hun a hmang a ni.

 

             

              Pu T.Lalenmawia, CLS-in Bible chang Isaia 61:6 “Nangni erawh chu, “Lalpa puithiamte,” tia vuah in in awm ang a: miten, “Kan Pathian rawngbawltute,” an ti ang che u : hnam tin sum in ei ang a, an ropuina chu in inchhuan phah ang” tih chhiarin tawngtairual vawikhatna kaihruai a, thupui pahhnih hmanga tawngtairualna hun hman a ni:

1. Territorial Evangelical Ministry (TEM) Speaker zawng zawngte, Pathianin a hman zel theih nan.

2. IET chhungah Chandamna Sipai member kan lo pun theih nan.

 

              Bazar Corps SAY-ten Pathian fak leh chawimawinan hla “Chawimawina” tih mawi takin an rawn sa a ni.

 

              Pi K.Vanlalhriati, Falkland Corps-in Bible chang Isaia 62:7 “Leiah hian fakawma a siam hma loh chuan, nangni Lalpa hritpuitua awmte u, awm hle hle hlek suh ula, amah pawh awm hle hletir hle suh u”, tih chhiarin tawngtairual vawihnihna kaihruaiin tawngtai thupui pahnih hmanga tawngtai hona hun neih leh a ni:

1. Mipui Vantlang tana kan rawngbawlna a enkawl mekte leh thawktu zawng zawngte tan.

2. Sualna chi hrang hrang avanga harsatna tisa, rilru leh thlarau lama tawk mek te tan tanpuitu tha kan nih zel theih nan.

          

    Zemabawk SAY Songster ten “Nunna luipui” tih hla mawi takin Pathian ropuinan an rawn hlan bawk a ni.

             

              Hruaituin Hla No. 191  “Kan lawm a che Thlarau Thianghlim”, tih thlangin Pathian faka zaihona hun hman a ni

              Durtlang CO Bial Songters te hnen atangin “Ringtu Tawngtaina” tih hla mawi tak leh nung taka sak ngaihthlak a ni.

 

              Evan Lalthanzama Hrahsel Speaker hnen atang  “Tawngtaina-ah ” tih thupui hmangin thusawi ngaihthlak a ni a. Bible Chang Jacoba 5:16 – 18 “Chutichuan, tihdama in awm theih nan in sualte thupha chawi tawn ula, intawngtaisak tawn thin rawh u. Mi fel tawngtaina chuan thil nasa tak a ti thin. Elija chu keimahni nungchang ang pu mihring bawk a ni a, ani chuan ruah sur loh nan thahnemngai takin a tawngtai a; tin, kum thum leh thla ruk chung zawng lei chungah ruah a sur ta lo va. Tin, a tawngtai leh a, vainin ruah a surtir a, leiin a rahte a rawn chhuahtir ta a.” tih chhiarin Tawngtaina hlutzia thu kan zirho tur thu a sawi a. Kan thu hriltu lar tak tak te pawn tawngtaina hi an ngaihpawimawh zia te ringtuten kan tih mak mawh a nih zia te leh Pathian leh mihringte len dunna awlsam ber a nih thu min hrilh a. Pathian kan biakna chu Tawngtaina a ni a, a chhanna kan hmuh letna chu Bible a nih thu a sawi.

              Tawngtai danah pawh hian chi hrang hrang awmin chibai bukna tawngtai, simna tawngtai, rinna tawngtai leh lawmthusawi tawngtai te hi a ni a, hemi bakah hian tawngtai satliah te hi a awm thin a ni. He tawngtai inkhawmpui kaltlang hian heng tawngtai satliah hmang thinte hi chuan I sim ang u, rilru leh tih tak zet a tawngtai hi ringtute chuan kan tih makmawh leh kan tih ngei ngei tur a ni. Kan nun chhungril ber hi Lalpa hian chang turin a duh a, tawngtai kawngah hian kan ulukin hma kan sawn tur a ni a, kan tih dan thin leh kan tih phung ang ringawt a hmang thin lo turin min duh a ni. Sipai kan nih angin Sipai te chu tawi fel takin kan tawngtai thin turin min duh a ni. Thinlung zawng zawng a tawngtai hi Lalpa chuan a duh ber a , a chhang rang ber bawk a ni. Kan thu hriltu lar tak te pawhin tawngtaina tak tak chuan nun a siamthara, a tidanglam thin a ni tiin an lo sawi thin a. Lalpa kan dawr dan ki pawh hi kan thlak danglam a ngai hle, kan duhdan ang ringawt ni lova a duh dan leh A aw ngaithla chunga kan rilru leh ngaihtuahna te kan siam rem ve a ngai a ni. Eng harsatna pawh tawkin, manganna tam tak nei thin mah ila tha thlah lova Lalpa kan auh chhunzawm zel hi a ngai a, thinglung zawng zawngin Lalpa be thin turin min chah a ni.

 

              Maj.T.Vanlalnghaka Chawlhhmun Bialtu C.O in “Khawvel tufinriat zauah hian” tih hla thlangin Pathian faka chawimawina neih zawhah malsawm tawngtainain Fakna inkhawm a ti tawp a ni.

CHHANDAMNA INKHAWM

 

              Maj.R.Lalringngheta, Co-ordinator, DPCC-in inkhawm kaihruaiin Bible chang hmun hnih a mi Roreltu leh Jona 2:1 & 7 te chhiarin heng Bible chang a tarlan te ang hian tih tak zeta tawngtaia kan dil chuan engtik lai pawhin min lo ngaithlain min lo pawm reng a ni tih a sawi a, tawngtaina hun neiin inkhawm tan a ni.

        

     

              Pu R.C Daniela, CSM Vaivakawn Corps-in puantur tul puanna leh thawhlawm lakkhawmna hun a hmang a, Division lamin hetiang ang Programme thleng thei tura min lo ruat hi lawmthu a sawi a, Vaivakawn Corps-te chu engtik lai pawhin an inhuam reng thu a sawi a ni.

 

              Pu Lalthansiama, Ramhlun Corps-in tawngtairual vawikhatna kaihhruaiin tawngtai thupui pahnih te hmangin tawngtai hona hun neih a ni:

1. Central North Division chhunga Local Officer zawng zawng te tan.

2. Pathian ram thil pekah hma kan sawn zel theih nan.

 

                             Vaivakawn Corps Band-te hnen atangin Pathian fak leh chawimawinan “Ropuia ngamtu kan ni” tih hla mawi takin an rawn rem a ni.

 

              Division Songster-te hnen atangin Pathian fakna hla mawi tak “Isua kan la tawk ang” tih ngaihthlak a ni.

 

              Hruaituin Hla No.321 “Hmanlai Faraw-a bawihte kha ” tih hla thlangin Pathian fak a zaihona hun hman a ni.

              Salem Bial Songsters-ten “Ka awmpui reng ang che” tih hla mawi takin an rawn sa a ni.

 

              Pu Ngurchhinga, CSM-in tawngtairualna vawihnihna kaihruaiin tawngtai thupui pahnih te hmangin tawngtairualna hun neih a ni:

1. Pathian hnenah Tawgtai Inkhawmpui hlawhtling tak min buatsaih sak avanga lawmthu sawina.

2. Prayer Ministry rawngbawlna a lo darh zel a, Tawngtai Pasaltha kan lo pun zel theih nan.

              Maj.S.T Dulan tawngtairualna a tawp kharna hun a rawn hmang a ni.

 

              Chanmari West Corps SAY Songsters-ten “Puan var sin” tih hla nung takin Pathian fak leh chawimawi nan an rawn sa a ni.

 

              Pu R.Lalhuliana, Secretary DPCC-in puan tur tul te leh tawngtai inkhawmpui Report pekna hun a hman bakah Chandamna Sipai pawl niha; tawngtai pual bik hun hran kan neih te hi a lawmawm bik zia a sawi a. Hun tha min petu kan Pathian chungah lawmthu kan sawi a. Division hruaituten Vaivakawn Corps a thleng tura an rawn thlan avang pawn lawmthu a sawi a ni. He hun hmanga ti hlawhtlingtu zawng zawngtute , mawhphurhna neitute bakah Member rawn inkhawm zawng zawngte chungah lawmthu a sawi tak meuh meuh bawk a ni.

 

              Evan Lalthanzama Hrahsel. Speaker hnen atangin Bible chang Hosea 6:1 chhiarin, “Hawh u, Lalpa hnenah I kir ang u; Min lo pawt sawm tawh na a, min ti dam leh dawn si a; Min lo vaw tawh na a, min tuam leh dawn si a,” tih thupui hmangin thu a sawi a. Mizote hi hnam vannei tawp kan ni a, India hmar chak tawpah awm kan ni chung hian Lalpa hnam hriat kan ni tlat hi a ropui a ni. Chanchin tha kan hriat ruala kan awih hnghal thlap theihna te hi kan vanneihna a ti chiang hle mai a, khawi hmunah pawh zohnathlak awmna te hi chu Christian vek an ni tlangpui thin. Harhna hian min chenchilhin min khawih reng thei te hi Pathian hnam thlan kan ni tih tichiang em em tu pakhat a ni. Christianna a lo luh hnuah kan sual te kan sim a Lalpa hnen a kan intuh luh hnuah khan khawvel danglam zelin kan rinna a ti dalin Kross hi kan lo kalsan thui leh tawh em em a. Chuvang chuan kan ram hi Kross ah kan kir leh a ngai tawh a ni. Hawh u, kan ramah hian Kross hi I tungdingin Lalpa hnenah hian I kir leh ang u, a aia chhuan dang reng reng neih loh I tum ila, kan pianna ramah hian I kir leh ang u. Chak loh chang, beidawng chang, dai pelh chang te a awm thin mihring kan nih angin do zoh loh hi kan nei vek thin a chuvang chuan Lalpa hnenah hian kir fo hi kan mamawh leh thin a ni. Nitin a intuai thar ngai vek kan ni. Lalpa erawh chuan kan sualna leh atna te hi a theihnghilh vek a min ngaihdam huamin a hnena kanin lam let hun hi a lo nghak reng zawk a ni. He inkhawmpui kaltlang hian Lalpa hnenah I kir leh ang u.

 

              Maj.Jerry Lalrozaman Hla No. 244 “Aw Pathian, nang Lalber I ni” tih thlangin Pathian fak leh chawimawina neih a ni a. Zahngaihna thutthleng hmaah inhlan tharna hun hawngin malsawm tawngtainain Tawngtai inkhawmpui chu a tiak tir a ni.